gdpr-iloj

Jen, la teamo de WordPress eldonis version 4.9.6, kun iloj por helpi observi la novan eŭropan leĝon pri privateco. Tiu leĝo iĝos observebla en la 25a tago de la monato.
Ek al la pretigado!

Kutime, mi afiŝas pri la nombro da elŝutoj post ĉefa eldono. Sed 6 monatoj jam pasis, do mi informas, ke okazis jam 11 546 elŝutoj de versio 4.9 de WordPress. Do, pli ol 11 mil. La ekrankopio kun nia parto:
Bonvole uzu la forumojn por demandi kaj helpi unuj al la aliaj. Se vi spertas problemon pri uzo de la forumoj, petu helpon cfmckee@gmail.com.

Planita dato por gdpr-iloj

La iloj por administrantoj kaj uzantoj rilate GDPR aperos en nova neĉefa eldono. La eldono de tiu versio, 4.9.6, estas planita por la 15a de majo.

Pli: se vi volas privatecan politikon kun multaj detaloj aŭ kun detaloj sub superrigardo pri privateco, vi rajtas uzi la tekstojn ĉe https://github.com/gdpr-compliance/info/blob/master/Privacy-policy-snippets.md.
Dankon, programisto Allen Snook.
Ekzemple, unu tekstopecon el 5 pri kuketoj:
Se vi ne estas ensalutinta kiam vi lasas komenton ĉe tiu ĉi retejo, vi povas rajtigi nin konservi viajn nomon, retpoŝtadreson kaj retejon. Se vi donas al ni tiun rajton, tri kuketoj estos kreitaj – unu por via nomo, unu por via retpoŝtadreso kaj unu por via retejo. Tiuj kuketoj estas unikaj al tiu ĉi retejo kaj daŭros 1 jaron. La kodoj estas:

(comment_author_{site}, comment_author_email_{site}, comment_author_url_{site}).

Pro neniu aktiveco en la forumo, mi ne sentas bezonon traduki tiujn tekstojn.

Aplikeblo de GDPR

Mi kreis du afiŝojn en forumo pri preparo por GDPR. Unu enhavas la komencan bazon por privateca politiko, por helpi vin starigi skeleton de paĝo. Ili estas ĉe https://eo.wordpress.org/support/forum/wordpress-generale/gdpr/.
Kaj pardonon: kiam mi starigis la forumaron, mi erare kreis forumon WordPress kaj enmetis kategoriojn kiel sub-forumojn. Devas esti la inverso: kreo de kategorio kun posta kreo de subaj forumoj!

GDPR en majo

GDPR, Ĝenerala Datuma Protekta Regulo de la Eŭropa Unio, iĝos deviga en la 25a de majo 2018, en la EU kaj rilate personajn informojn de enloĝantoj de la EU. Posedantoj de WordPress-ejo havos eblon aldoni paĝon pri privateca politiko, kun aldono de la privatecaj informoj de uzataj kromprogramoj.

Posedantoj de retejo ankaŭ povos ricevi kaj trakti petojn de uzantoj rilate montron, elŝuton aŭ sennomigon de personaj informoj.

Nova paĝo Privateco aperos en la menuo sub Iloj, por montri kaj pritrakti tiujn petojn.
Ekzistos retpoŝta konfirmo por certigi, ke peto venas de ĝusta persono – tio evitos fiuzon de la eblo peti elŝuton de personaj informoj.

En la angla.

Forumoj

La temo WooCommerce estas tre granda, tiel granda kiel la temo WordPress! Forumo estus granda helpo al uzantoj.

La forumoj de la esperantlingva WordPress estas ĉe: https://eo.wordpress.org/support/.

Se iu volas forumon aldone al WordPress ĝenerale, WooCommerce kaj BuddyPress, diru! Se iu volas esti kontrolanto en forumo, diru!
Se iu volas esti klavmajstro, diru. Mi ne volas esti. Mi volas nur traduki.

Tria Vu-konsileto

Aŭtomata numerado de SKU-oj

Se allogas vin la eblo aŭtomatigi var-numeradon de SKUoj, per Booster por WooCommerce, konatiĝu kun la ŝablono.
Ŝablono de SKU-numero: {category_prefix}{prefix}{sku_number}{suffix}{category_suffix}{variation_suffix} =
prefikso de kategorio + prefikso + cifera parto de SKU + sufikso + kategoria sufikso + sufikso de variaĵo
.

Se vi ofertas multajn simplajn varojn, la senpaga versio funkcias bone.

Se vi havas vendejon Vestaĵoj Por Vi kaj ofertas sportĉemizon (en kategorio Sporto) en 3 versioj: malgranda, mezgranda kaj granda, kaj vi volas malsamajn SKUojn por ĉiuj grandoj…..
Vi decidas uzi ĝeneralan prefikson por SKUoj kiu estas mallongigo de via vendejo: VPV. Vi pensas, ke vi ne uzos ĝeneralan sufikson. Vi decidas ekspluati la fakton, ke aldono de kategoria sufikso estas senpaga, do vi entajpas sufikson SPO por la kategorio Sporto.
Vi malkovras, ke “Variaĵoj de variaj varoj” havas opcion nur “SKU same kiel patra varo” en la senpaga versio.
Vi malridetas, ĉar vi vere volis havi malsamajn SKUojn por ĉiu grando de tiu ĉemizo.
La SKU devos esti simila al: VPV1SPO por ĉiu grando de via sportĉemizo!
Sed iru al viaj variaĵoj en tiu ‘afiŝo’ de varo kaj permane donu la deziratajn SKUojn al ĉiu variaĵo. Ĉiaokaze, ĉiu variaĵo ricevas unikan ID-on.

Do, vi devis doni SKUon por la variaĵoj permane en la senpaga versio.

P.S. Mi komencos meti konsiletojn en malsama loko.

Dua Vu-konsileto

Varia varo

Vi volas krei variaĵojn de varo. Ni diru, ke via varo estas ĉemizo. Iru al Varoj -> Aldoni novan.
Iru al la skatolo Vardatumoj. Elektu ‘Varia varo’. Iru al ‘Atributoj‘. Apud la vortoj ‘Propra vara atributo‘ alklaku la butonon ‘Aldoni’. Entajpu nomon, eble Grando, se temas pri etaj, mezgrandaj kaj grandaj ĉemizoj. En la skatolo Valoro(j), vi povas entajpi Malgranda|Mezgranda|Granda. Jes, apartigu valorojn per tiu vertikala strio.
Alklaku ‘Konservi atributojn’.
Iru al ‘Variaĵoj‘. Elektu krei variaĵojn el kombinoj de tiuj atributoj, ĉar vi jam aldonis la bezonatajn informojn.
Ŝvebigu la muson super ĉiu variaĵo kaj vidu la sagon aperi apud ĉiu (kun movilo kaj eblo forigi la variaĵon). Alklaku la sagon kaj vi povas ebligi stokadon de tiu variaĵo, doni ekzemplerojn en stoko, malsaman SKU-on al tiu variaĵo, bildon de tiu variaĵo, ktp.
Memoru konservi viajn ŝanĝojn post ĉiu paŝo.
Ho, kaj dum vi estas en Variaĵoj, vi povas elekti defaŭltan variaĵon. Tiu estos ŝargita kaj vidita kiam kliento vizitas tiun varon. Tiu eblo estas ĉe ‘Defaŭltaj valoroj por formularo:‘ Se vi ne elektas defaŭltan, la vara bildo aperos (alŝutu varan bildon! – tiu skatolo troviĝas al la dekstro) kaj la falmenuo diros ‘Elekti opcion’.

Varia-varo
Difino de stoko, ktp. de unu variaĵo.

Unua Vu-konsileto

Por uzantoj de WooCommerce, Vu-komercistoj: konsileto 1:

Malfermo de administraj rigardoj

Kiam vi alklakas al WooCommerce en la administra panelo de WordPress, tuj rigardu al la supro. Ĉu vi vidas langeton “Ekranaj agordoj”? Alklaku kaj marku ĉiujn skatolojn, por ricevi plenan administran tabelon.

Se vi uzas Booster por WooCommerce, iru al Agordoj de Booster, trovu kaj ebligu la modulon Administra breto en Retpoŝto k. divers. Vi ricevos novan breton je la supro de la administra panelo de WordPress.

Poste, ĝisu vian familion. Vi estos perdita dum jaroj en amaso da ebloj kaj ecoj de Booster.